O PP de Vigo denunciou este luns o peche da oficina do ISFAS (Instituto Social das Forzas Armadas) na cidade, o que afecta a unhas 4.000 familias que terán que desprazarse a Pontevedra para realizar as súas xestións neste organismo, nunha decisión do Goberno central que “ignora” ao alcalde, Abel Caballero.
Segundo trasladou a portavoz do partido en Vigo, Teresa Cendón, este peche mostra a “incapacidade” do rexedor olívico “cando teñen que enfrontarse a decisións desacertadas do seu goberno ‘amigo’ en Madrid”, e a súa pouca influencia no Executivo e no Ministerio de Defensa. “De feito, o alcalde asegurou que non ía deixar que desmantelasen os servizos públicos”, apostilou.
O peche da oficina é, para o PP vigués, “un novo ‘non é non'” para a cidade, e “un desprezo máis que o goberno de Pedro Sánchez realiza a Vigo”.
“Ao alcalde encántalle subirse aos escenarios e facerse fotos, pero cando se trata de atender as demandas dos cidadáns e solucionar os seus problemas queda de brazos cruzados e o seu propio goberno socialista ignórao”, afirmou Teresa Cendón.