O goberno municipal de Vigo asegurou, a través dun comunicado que asina a concelleira de Seguridade, Elena Espinosa, que o servizo de bombeiros da cidade funciona “con absoluta normalidade”, a pesar de que este mércores se inicia unha folga indefinida nos parques municipais.
A concelleira recalcou que “este servizo público está garantido”, á vez que lembrou que a folga “foi convocada só por CIG e CUT, sen que o resto de sindicatos a secunden”.
Por outra banda, e con respecto ás reivindicacións dos convocantes do paro (que reclaman ampliar o persoal para corrixir a sobrecarga de traballo e a realización “masiva” de horas extras), Espinosa subliñou que o Concello “negociou e acordou por unanimidade con todos os sindicatos” as prazas de bombeiros para a Oferta Pública de Emprego de 2019, unha OPE “que está a seguir os trámites esixidos pola lei”.
“En todo caso, o goberno local respecta o dereito á folga destes ou de calquera outros traballadores públicos, como non pode ser doutra maneira”, conclúe o comunicado.
CIG e CUT denunciaron este mércores que a escaseza de persoal levou a que nin sequera haxa efectivos suficientes para cubrir o decreto de servizos mínimos. Así mesmo, puxeron en coñecemento da Inspección de Traballo a suposta vulneración de dereitos dos axentes en prácticas que, segundo aseguraron, teñen que facer labores “de bombeiros veteranos” sen ter nin a experiencia, nin a formación, nin o salario dos seus compañeiros.