O home de 55 anos de idade, E.F.A., detido en Vigo o pasado martes por un suposto delito de detención ilegal en grao de tentativa, tras tentar levar a un menor dun parque infantil, quedou en liberdade tras comparecer ante o Xulgado de Instrución número 7 da cidade.
Segundo confirmaron fontes do Tribunal Superior de Xustiza, o xulgado decretou a súa posta en liberdade, aínda que en calidade de investigado, e impúxoselle a prohibición de achegarse ou comunicarse co neno, de 9 anos de idade.
A Policía Local de Vigo detivo a este home tras recibir un aviso de que se produciu un intento de secuestro dun neno nun parque do barrio do Calvario. Os pais do menor relataron aos axentes que o sospeitoso se achegou ao seu fillo e aos seus amigos, que estaban a xogar no parque, e convidara ao menor a acompañalo a outro lugar afastado, para ensinarlle un xoguete, levándoo por un brazo.
Un veciño do lugar, que coñecía ao neno, alertou ao seu pai, quen saíu á carreira e viu como o home levaba ao seu fillo. O home encarouse co sospeitoso, ao que increpou, e este soltou ao neno e abandonou o lugar apresuradamente.
O propio neno explicou aos axentes que o home se lle achegadara e que o convidou a ir con el a outro sitio, onde había “un camión de xoguete”. O seu pai relatou que ese home levaba días frecuentando ese parque, e que sentaba a observar aos nenos mentres manipulaba un computador portátil.
A Policía localizou a E.F.A. nas inmediacións e detívoo. Ao inspeccionar a mochila que levaba, atoparon no seu interior un computador portátil, un disco duro externo e un coitelo de 22 centímetros de folla, entre outros efectos.