Abel Caballero afirma que debe ser Feijóo quen conteste as súas demandas porque outros cargos poden “cesarse en 5 minutos”

A Xunta cuestiona a vontade de diálogo do alcalde de Vigo por "faltar á verdade" e mostrar unha "actitude victimista"

O alcalde de Vigo, Abel Caballero, durante a súa comparecencia en rolda de prensa este martes

O alcalde de Vigo, Abel Caballero, remarcou que debe ser o presidente da Xunta, Alberto Núñez Feijóo, quen responda as necesidades da cidade, que lle trasladou esta semana mediante unha carta, debido a que, na súa opinión, as afirmacións doutros altos cargos “non valen” dado que “poden ser cesados en cinco minutos”.

Así se pronunciou este martes, a preguntas dos xornalistas nunha rolda de prensa en Vigo, despois de que o vicepresidente do Goberno galego, Alfonso Rueda, remarcase que as negociacións co Concello olívico non deben estar condicionadas a “esixencias e ultimátums”. nte esta situación, o rexedor de Vigo subliñou a importancia de que sexa Feijóo a persoa que se pronuncie respecto da carta remitida, xa que, ao seu xuízo, calquera outra posibilidade suporía “esconderse”.

Neste sentido, advertiu de que os vigueses “atenderán” á resposta que o presidente autonómico dea ás demandas relacionadas coa cidade, que definiu como “débedas da Xunta con Vigo”.

Ademais, o alcalde olívico volveu a facer referencia ao desastre electoral do PP en en a urbe galega –pasou de 13 a sete edís nas eleccións municipais de 2015 e de sete a catro nas de 2019–, resultados que leu como “mensaxes” da cidadanía ao presidente autonómico.

Nesta liña, instou a Feijóo a iniciar unha “etapa nova” na relación coa cidade mediante “feitos”, xa que, segundo volveu a reprobar, os resultados das reunións que mantivo con anterioridade co titular do Executivo galego foron “moitas fotos e ningunha realidade”, xa que, “nunca cumpriu as súas promesas”.

Abel Caballero tamén denunciou que a delegada territorial da Xunta en Vigo, Corina Porro, trasladouse á cidade para “dicirlle que non” ás súas demandas despois de que esta reiterase o compromiso do Goberno galego coa urbe e a favor do diálogo co Concello olívico, á vez que advertiu de que as “imposicións” serían un “obstáculo” para o consenso.

ACTUACIÓNS DEMANDADAS

Adicionalmente, volveu a acusar a Feijóo de impulsar a candidatura Cíes-Parque Illas Atlánticas ao Patrimonio da Humanidade da Unesco para “frear” a apoiada para o arquipélago vigués en solitario. Así, denunciou o “escurantismo” ligado á presentación desta candidatura, que, segundo asegurou, “non queren” os habitantes das Illas de Ons. Tamén considerou que a presentación a este recoñecemento da Ribeira Sacra prexudicará a consecución do mesmo para as illas.

Así mesmo, denunciou que a Xunta non avogue pola construción de chan industrial na cidade e acusouna de optar por municipios como Mos para este fin, ademais de reclamar a recuperación do proxecto inicial do centro de saúde de Bouzas. En relación ao abastecemento de auga, volveu ha defender a necesidade dun transvasamento de urxencia e criticou que o Concello deba pagar un canon polo mantemento da presa de Eiras.

O rexedor reclamou ademais que o Goberno galego destine fondos ás obras de reforma do estadio de Balaídos, xa que acolle os partidos do principal equipo de fútbol galego. Tamén o instou a iniciar a construción do instituto de Navia, así como a acometer melloras noutros centros educativos, e a impulsar a Formación Profesional (FP) na cidade.

Abel Caballero esixiu unha vez máis subvencións para concertos e festas na cidade, así como para as súas orquestras sinfónicas, e demandou a retirada do recurso contencioso administrativo interposto pola Xunta contra a constitución da área Metropolitana de Vigo, entre outras actuacións.

RESPOSTA DA XUNTA

Pola súa banda, a Xunta de Galicia cuestionou este martes a vontade de diálogo do alcalde de Vigo, Abel Caballero, de quen volveu a criticar a súa intención de “pór condicións”, en lugar de facilitar ese diálogo, e lamentou que o rexedor olívico “falta á verdade” e adoptou unha “actitude victimista”.

Así o trasladou, a preguntas dos medios, a delegada territorial do Goberno galego na cidade, Corina Porro, quen repetiu que, “cando hai ánimo de dialogar, o mellor é aproximar posturas e non pór condicións”.

Corina Porro incidiu en que as demandas do alcalde (como condicións previas para esa aproximación coa Xunta) “parece que están buscadas para non establecer o diálogo”, e repetiu, entre outras cuestións, que non se pode retirar “a única candidatura rexistrada” das Cíes para ser Patrimonio da Humanidade; que hai que cumprir a lei de Patrimonio nas obras de Gran Vía; que as obras para as que o alcalde pide aplicar a lei 3/2016 pódense facer cunha modificación da PXOM; ou que os tribunais “xa se pronunciaron” sobre a área Metropolitana.

Por outra banda, a delegada tamén recalcou o “compromiso” do goberno galego coa cidade, e subliñou que, na actualidade, hai obras e investimentos promovidos en Vigo polo goberno de Feijóo por valor de máis de 85 millóns de euros. “Como se pode criticar iso? É malo que veñan conselleiros á cidade? É malo que se financien estudos de inglés, que se fagan albergues, que se tripliquen as axudas ao Marisquiño?…”, preguntou Corina Porro.