Adif informou este martes da adxudicación do contrato para o servizo de mantemento das instalacións do telemando de enerxía dos tramos Ourense-Santiago (Corredor Norte-Noroeste de Alta Velocidade) e Vigo Urzáiz-Santiago-A Coruña (Eixo Atlántico de Alta Velocidade).
O contrato foi adxudicado a Schneider Electric España por 1.277.581,69 euros (IVE incluído) e conta cun prazo de execución de 36 meses. A adxudicación inclúe o mantemento preventivo (cíclico, segundo estado, predictivo e extraordinario), así como o correctivo.
O obxectivo da actuación é “manter en perfecto estado de conservación e funcionalidade os sistemas e equipos que compoñen os postos centrais, subestacións, centros de autotransformación e telemando”, dixo Adif a través dun comunicado, “garantindo ao mesmo tempo a seguridade do subsistema”.