O secretario xeral para o Deporte, José Ramón Lete Lasa, asinou o convenio polo que a Xunta destinará 121.000 euros a O Marisquiño xunto ao director do evento, Joako Ezpeleta, e resaltou a súa relación coa comunidade e a cidade que o acollen, Galicia e Vigo.
Durante unha rolda de prensa, Lete Lasa destacou o “esforzo” realizado por parte do Executivo autonómico para colaborar con este festival e apuntou que a contía destinada este ano case triplica as cifras de 2018. Así, avanzou que a Xunta non limitará o apoio económico prestado nos próximos anos.
Deste xeito, puxo en valor a “madurez” alcanzada polo evento durante as súas 18 edicións previas, así como o feito de que se celebre unha vez máis na cidade olívica. “Non se entenden Galicia e Vigo sen O Marisquiño”, defendeu.
Respecto da edición deste ano, o número 19, avanzou que se espera que congregue a 160.000 persoas, así como que contará con tres competicións mundiais nas modalidades de ‘skateboarding’, ‘Dirt Jump’ e ‘basket 3×3’. A ese respecto, tamén apuntou que catro das probas son ou serán olímpicas nas próximas datas.
Así mesmo, a directora de Turismo, Nava Castro, lembrou que un terzo dos asistentes ao evento en pasadas edicións procedían de fóra de Galicia e destacou o feito de que cada ano o festival, que axunta música, deporte e gastronomía, some un maior número de visitantes.
A delegada territorial da Xunta en Vigo, Corina Porro, afirmou que O Marisquiño exerce como “escaparate internacional” da cidade olívica e incidiu na colaboración entre distintas administracións que permitirá a súa celebración.
