Tony Lomba & Elio dos Santos e Heredeiros da Crus actuarán en Vigo este venres

Ademais, Porta do Sol acollerá un concerto de Son de Seu este xoves ás 22,00 horas e outro de Mitic este sábado ás 22,30 horas.

Porta do Sol © Miguel Nuñez

O alcalde de Vigo, Abel Caballero, avanzou que Tony Lomba & Elio dos Santos e Heredeiros da Crus actuarán este venres, 12 de xullo, na Porta do Sol de Vigo a partir das 22,00 horas.

En rolda de prensa, o rexedor olívico lembrou que o concerto se fixou para Entroido, pero tivo que ser cancelado por motivos meteorolóxicos. Caballero sinalou que os compoñentes de Heredeiros da Crus rexeitaron cobrar polo concerto que ofrecerán esta semana en Vigo ao aludir a que percibiron a remuneración acordada polo que foi cancelado hai uns meses.

Ademais, Porta do Sol acollerá un concerto de Son de Seu este xoves ás 22,00 horas e outro de Mitic este sábado ás 22,30 horas. Estas actuacións sumaranse ás que ofrecerán grupos de folk como Semente da Arte Galega, Loureiro Verde, Acordeóns de Valadares, Froles Novas e Pandereiteiras entre este xoves e este venres na zona desde as 19,00 horas.

Este sábado, a xornada estará amenizada desde as 11,00 horas nas inmediacións da praza viguesa por grupos como Andarela, A Buxaina, Gaitas Atlántida e Corisco e, ás 21,00 horas, Amparanoia actuará na terraza do Auditorio Mar de Vigo.

TRANSPORTE

Adicionalmente, o alcalde detallou que o Concello habilitará lanzadeiras ao Parque de Castrelos con motivo dos concertos programados durante xullo e agosto nesa zona. Así, o percorrido destes autobuses, que se suman ás liñas habituais, estenderase por Praza de América, Camelias, Romil, Paseo de Alfonso, Policarpo Sanz, García Barbón, Isaac Peral, Travesía de Vigo e Gregorio Espino.

O rexedor detallou así mesmo que se reservará o aparcadoiro situado no parque para persoas con mobilidade reducida, así como que se ampliarán os servizos de seguridade e que se cortará a avenida de Castrelos para facilitar a evacuación cando finalicen os concertos.

Tamén explicou que se porá en marcha un servizo de transporte aos parques forestais de Vixiador, Monte dos Pozos e Beade para facilitar o acceso a eles.

Noutra orde de cousas, apuntou que, desde este mércores ás 10,00 horas, se cortarán catro dos carrís de Gran Vía no marco das obras que permitirán a instalación de escaleiras mecánicas na parte central e que culminarán en abril de 2020.