Axentes da Policía Local de Vigo detiveron a un home que ameazou á camareira dun local da cidade, porque esta se negou a servirlle alcol, e que agrediu a un dos axentes que interveu para identificalo.
Segundo informaron fontes policiais, os feitos ocorreron na tarde deste luns, nun local de hostalaría da rúa Ramón Neto, onde acudiu unha patrulla para intervir nun altercado. Ao chegar, unha empregada do establecemento explicoulles que un dos clientes, que nese momento se atopaba na terraza, a ameazara pola súa negativa a servirlle alcol, xa que se atopaba ebrio.
O home chegou a romper un vaso contra a barra do local e tentou agredir á camareira, aínda que varios clientes se interpuxeron para evitar o ataque. Cando os axentes se dispuñan a falar con el para aclarar o sucedido, este, sen mediar palabra, levantouse bruscamente, encarándose cos funcionarios e negándose a facilitar ningún dato.
Nun momento dado, propinou unha forte puñada no peito a un dos policías, polo que foi detido e posto a disposición xudicial como presunto autor dun delito de atentado contra axente da autoridade.