Un programa analizará a presenza de mulleres en consellos de administración de Galicia

O delegado do Estado na Zona Franca de Vigo, David Regades, detallou que esta entidade impulsa un programa que, desde este venres e durante un ano, analizará a presenza das mulleres en consellos de administración de empresas radicadas en Galicia.

Unha homenaxe lembra en Vigo ás primeiras mulleres que se sumaron á Policía Nacional a pesar dos "convencionalismos"

O delegado do Estado na Zona Franca de Vigo, David Regades, detallou que esta entidade impulsa un programa que, desde este venres e durante un ano, analizará a presenza das mulleres en consellos de administración de empresas radicadas en Galicia.

Durante a presentación deste proxecto, denominado Programa Conselleiras de Galicia, indicou que se desenvolverán distintos debates nos que participarán homes e mulleres durante os próximos doce meses. O primeiro deles tivo lugar este venres en Vigo a porta pechada tras a presentación e contou coa participación da conselleira de Cellnex e Telecom, Marieta do Rivero.

Nese contexto, detallou que o proxecto buscará identificar as “barreiras” que “frean” o acceso do xénero feminino aos consellos de administración e propor medidas que o faciliten. Ademais, sinalou que o programa aspira a aplicar técnicas de investigación cualitativa, a analizar casos de éxito e a propor accións que poida desenvolver a Zona Franca para “contribuír ao avance das empresas de Galicia”.

Regades incidiu no feito de que as mulleres só representan o 20 por cento dos integrantes dos Consellos de Administración de empresas cotizadas españolas e o 14,3 por cento dos directivos. Mentres, só supoñen un 7,7 por cento dos conselleiros de empresas a nivel europeo e un 5,7 dos postos de dirección. Así, remarcou a importancia do novo proxecto debido a que non existen datos respecto de Galicia.

Tamén apuntou que o Foro Económico Mundial indicou que serán necesarios 217 anos para conseguir a paridade entre homes e mulleres, unha situación que, ao seu xuízo, require “acelerar” o proceso, unha acción na que se enmarca o proxecto presentado.

ACCESO A ALTOS CARGOS

A presidenta da Deputación de Pontevedra, Carmela Silva, incidiu no feito de que as mulleres supoñen o 58 por cento dos titulados uiversitarios e, con todo, teñen maiores dificultades para acceder aos altos cargos. Por iso, resaltou a importancia de identificar as causas desta situación. Tamén avogou por promover a matriculación de mulleres nos graos relacionados coa ciencia e a tecnoloxía debido a que os postos de traballo que se crearán no futuro están relacionados con estas ramas nas que aínda a presenza feminina é minoritaria.

A maiores, Marieta do Rivero mostrouse preocupada polo baixo número de directivas en España que, na súa opinión, inflúe na porcentaxe de mulleres en Consellos de Administración. Así, incidiu na necesidade de demostrar que “queda moito por facer” para alcanzar a igualdade.

Tamén puxo en valor o desenvolvemento do proxecto para poder identificar a situación das mulleres en empresas en Galicia, analizar as súas causas e, así, “acelerar” o proceso de integración destas nos consellos de administración.