O BNG pide precintar a obra dunha casa de apostas na Florida, que continúa malia non ter licenza

O BNG pediu ao Concello de Vigo que precinte as obras nun local onde se prevé instalar unha casa de apostas, na Avenida da Florida, xa que os traballos carecen de licenza e, con todo, séguense facendo "a porta pechada".

Protesta contra as casas de apostas en Navia / © Miguel Nuñez

O BNG pediu ao Concello de Vigo que precinte as obras nun local onde se prevé instalar unha casa de apostas, na Avenida da Florida, xa que os traballos carecen de licenza e, con todo, séguense facendo “a porta pechada”.

Así o denunciou o concelleiro nacionalista, Xabier Pérez Igrexas, quen remitiu un escrito á concelleira de Urbanismo, María José Caride, trasladando a denuncia dos veciños, que afirman que a obra continúa a pesar de que o Concello denegou o permiso por motivos técnicos.

Estes veciños alertaron á Policía Local que, este mércores, se personó no lugar levantando atestado, pero o BNG pediu ao goberno municipal que “adopte medidas” para impedir que continúen eses traballos sen licenza. “Saudamos a resolución adoptada por Urbanismo (de denegar o permiso), pero esta non pode quedar en papel mollado”, engadiu.

Finalmente, Pérez Igrexas constatou a “enorme preocupación” da veciñanza pola posible apertura desta casa de apostas, xa que a empresa mantén a inauguración do local para o próximo 11 de xullo.