Un veciño de Vigo de 31 anos de idade, L.M.G.S., resultou ferido ao golpearse no nariz coa barra dunha lámpada que estaba apilada na beirarrúa con outros mobles durante unha mudanza e que o prexudicado non viu por estar atento ao seu teléfono móbil mentres camiñaba.
Segundo informaron fontes policiais, os feitos ocorreron na mañá deste luns, cando este peón camiñaba, pendente do seu teléfono, pola rúa Sanjurjo Badía. Ao non estar atento ao que ocorría ao seu redor, chocou contra a barra metálica dunha lámpada, que estaba apilada na beirarrúa xunto con outros mobles, depositados por traballadores dunha empresa que estaban a realizar unha mudanza.
O mozo chamou á Policía e os axentes requiriron aos traballadores da empresa o documento que acredita a existencia de seguro de responsabilidade civil. O traballador, que non tiña dito documento, sinalou aos axentes que o presentaría posteriormente, mentres que o mozo ferido foi trasladado ao Hospital Álvaro Cunqueiro de Vigo, para a valoración das lesións, que se incluirá no parte de reclamación de danos.