Marea de Vigo traballará desde o Concello para recuperar programas de lecer alternativo para mozos, como a iniciativa ‘Súbete ao Castro’, ou a actividade da Casa da Xuventude, así como medidas políticas para facilitar o acceso ao emprego ou á vivenda.

Así o trasladou o candidato á Alcaldía, Rubén Pérez, nun encontro sobre mocidade celebrado no monte de Ou Castro, e criticou o “desmantelamento” das infraestruturas de encontro xuvenil na cidade por parte do goberno local de Abel Caballero. O candidato prometeu traballar para que o Concello dote de orzamento suficiente ás políticas de mocidade, non só no ámbito do lecer, senón tamén noutras áreas, como en políticas de emprego ou de acceso á vivenda.

Entre as medidas propostas, destaca a implantación dun Plan Municipal de Emprego Xuvenil, ou a posta en marcha dunha bolsa de emprego “novo e non precario”. A deputada autonómica Paula Quinteiro, que participou no encontro, avogou pola necesaria “coordinación” entre administracións para poder ofrecer ás mozas alternativas de lecer pero tamén de futuro, para “que non teñan que emigrar”.