Acusan á Xunta de ter afastado dos plans de recuperación o xulgado número 3 de Vigo

Segundo o sindicato Alternativas na Xustiza-Central Unitaria de Traballadores (AXG-CUT), este xulgado ten máis de 1.000 execucións e 900 procedementos en trámite a día de hoxe, o que supón un 300% máis de carga de traballo que os outros dous xulgados do penal vigueses.

Xulgado de Vigo / Páxinas Galegas

O sindicato AXG-CUT denuncia que “nestes momentos, en cada Xulgado do penal da cidade, hai máis de 1000 execucións en trámite”. Explican ademais que ata arquivar a execución, a sentenza xudicial non se cumpre. Apuntan tamén que das1000 demandas acumuladas, hai aproximadamente “230 sen nin sequera incoar (iniciar)”.

“Os xuízos non correron mellor sorte: ademais do cento deles suspendidos durante a folga, entre os meses de xuño e xullo nun dos xulgados suspendéronse corenta xuízos de 102”. Todo isto implicaría novas citacións das partes, “o probable aumento de días con xuízos, retrasos nas sentenzas e futuras execucións”.

Por outra parte, consideran que logo da “aplicación “aleatoria” dos plans de actuación, véñense a confirmar os peores presaxios”. Isto tradúcese para o sindicato en que “no plan de actuación que abrangue desde o 27.5.2019 ata o 28.6.2019, se inclúen os xulgados do Penal nº 1 e 2 de Vigo”, así “queda excluído o xulgado nº 3, que por números, é como moito o máis sobrecargado de traballo”.

Dita sobrecarga de traballo non incluiría ningún dos dous xulgados afectados polo plan de actuación. “Pola contra, o nº 3 ten 65 procedementos e 66 executorias por incoar”.

UN 300% MÁIS DE CARGA DE TRABALLO

A AXG-CUT matén a postura de que os plans aprobados logo da folga na Xustiza eran “non só cutres senón ilóxicos e arbitrarios” ademais de ser plans “froito do descoñecemento ou falta de interese por parte dos artífices dos mesmos”. Desta maneira, consideran que se están a cumprir os seus “prognósticos”.

Explican ademais que “a situación dos xulgados do penal en toda Galicia, e en particular en Vigo foi sempre moi complicada, tanto pola falta de medios materiais e persoais como polas cargas de traballo”. Esta situación “vén sendo denunciada tanto nas Mesas de negociación como nos medios de comunicación dende hai moito tempo”.

A descrición do estado das dependencias, así como cadro de persoal nos xulgados é de “reducidos para as cargas de traballo existentes e deberían contar cun Tramitador Procesual máis”. E sinalan sobre todo que “a materia nestes xulgados pode ser calificada como sensible: tráfico de drogas, violencia sobre a muller, alcolemias, condución temeraria, entre outras”.

Acusan tamén da ralentización do traballo diario á falta de renovación en equipos informáticos, cousa que “obriga todos os días a perder boa parte da xornada laboral” sobre todo por “incompatibilidade entre o programa da Fiscalía (Fortuny) e o dos xulgados (Minerva)”.

No seu momento houbera, segundo AXG-CUT, unha solución parcial para quitar carga de traballo “mais coa chegada do actual Director Xeral, Juan Jose Martín, e da Subdirectora Xeral, Dolores Madrid, nomeados por Alfonso Rueda, as medidas de reforzo elimináronse e a estatística dos xulgados do Penal voltou aos números anteriores”.

DEIXAR UN COMENTARIO

Please enter your comment!
Please enter your name here