As consecuencias do movemento antivacunas e outros bulos que afectan á saúde infantil serán abordadas este sábado en Vigo por profesionais sanitarios na xornada ‘#SaludInfantilsinBulos para Pais Millennials’ que organizan o Instituto Saúde sen Bulos e Pais Millennials.
As charlas terán lugar este sábado, 25 de maio, no Salón de Actos do Hospital Álvaro Cunqueiro (HAC) de Vigo de 9,30 a 20,00 horas, informou a organización.
A xornada tratará catro bloques informativos. Así, abordará a alimentación infantil con información sobre ‘baby lead weaning’ e pautas para unha dieta equilibrada; e a vida sa na que se analizarán as consecuencias do movemento antivacunas e abordarase a importancia da fisioterapia pediátrica.
Tamén tratarán a saúde mental e educación sexual na que se falará de como previr o consumo de drogas e alcol; e os bulos máis comúns sobre saúde infantil como os relacionados coa lactación materna e a primeira dentición.
O Simposio ‘#SaludInfantilsinBulos para Pais Millennials’ conta coa colaboración de entidades como o Colexio oficial de Enfermaría de Pontevedra, a Deputación de Pontevedra, a Asociación Galega de Matronas e a Asociación Galega de Enfermeiras Especialistas en Pediatría.