O candidato de Marea de Vigo á Alcaldía da cidade olívica, Rubén Pérez, propuxo a creación de xuntas de distrito e de parroquias no municipio para atender “as necesidades de cada núcleo de poboación”.
Segundo recolleu nun comunicado a formación, o obxectivo desta medida é evitar as “diferenzas de trato entre o centro e os barrios e parroquias” que, ao seu xuízo, provocan a existencia de “cidadanía de primeira e de segunda (clase)”.
Deste xeito, búscase evitar “a intermediación de asociacións partidarias” e favorecer que a toma de decisións recaia en persoas que coñezan as necesidades de cada zona de “un modo directo”.
Así mesmo, Rubén Pérez reivindicou a importancia do desenvolvemento desta iniciativa para a defensa do comercio de proximidade que, na súa opinión, garante un “maior respecto polo medioambiente” e a produción local.
