O candidato do BNG á Alcaldía de Vigo, Xabier P. Iglesias, apostou por unha mellora das frecuencias do transporte urbano e defendeu a necesidade dunha mellor conexión das parroquias que, segundo criticou, só contan con rutas directas ata o centro.
Tras unha reunión celebrada este mércores co comité de empresa da compañía de transporte Vitrasa, Iglesias recalcou a necesidade de aumentar as frecuencias das conexións do autobús urbano e de crear máis carrís específicos para o transporte público para garantir a súa rapidez. Así, propuxo que os autobuses teñan preferencia sobre os turismos nas zonas máis transitadas e que os semáforos se poñan en verde cando sexan os autobuses urbanos os que se atopen fronte a eles. Así mesmo, remarcou a necesidade de garantir unha maior rapidez do transporte público para evitar o alongamento dos traxectos que requiren un transbordo.
Tamén apuntou que é precisa unha revisión dos percorridos das liñas, en especial aquelas que conectan á cidade co campus universitario e o Hospital Álvaro Cunqueiro. Deste xeito, mostrouse preocupado por que, en lugar de establecer liñas directas ao hospital, engádase esta parada ás xa existentes, o que, segundo indicou, leva un alongamento do tempo da ruta.
Nesta liña, avogou por unha conexión directa entre as dúas estacións de tren de Vigo, Urzáiz e Guixar, e unha mellora da liña que une á cidade co aeroporto de Peinador. Ademais, valorou o anuncio do goberno local de non prorrogar a concesión do transporte público, aínda que incidiu na necesidade de que a que se fará efectiva a partir de 2020 garanta a subrogación dos traballadores da compañía que presta o servizo na actualidade, Vitrasa.