A Fiscalía pide penas que suman 42 anos de prisión para José Luís L.P., presunto autor do disparo que acabou coa vida dun mozo na noite de San Juan de 2017, na praia de Arealonga en Chapela, Redondela (Pontevedra), e que será xulgado por un tribunal de xurado entre o luns e o venres na Sección Quinta da Audiencia Provincial de Pontevedra, con sede en Vigo.

Segundo o seu escrito de acusación, o Ministerio Fiscal atribúelle un delito de asasinato, un asasinato en grao de tentativa, un homicidio en grao de tentativa e un delito de tenencia ilícita de armas. Así mesmo, pide que se teña en conta a circunstancia agravante de reincidencia.

O relato dos feitos realizado pola Fiscalía conclúe que o día de San Juan de 2017, o acusado dirixiuse á noitiña ás inmediacións da praia de Arealonga portando consigo un revólver. Sobre as 5,00 horas, aproximouse a unha varanda e “ouriñou ou tentou ouriñar” sobre unhas mozas que estaban máis abaixo na praia.

Ao ver isto, Daniel B.P recriminoulle a súa conduta e este respondeu sacando o revólver e disparándolle “a contacto”, é dicir “a canón tocante co peito”. Daniel non tivo “ningunha posibilidade de defenderse”, e faleceu a consecuencia do disparo.

Unha persoa acudiu entón a socorrer ao mozo no chan e, “sen ser consciente de que se efectuou un disparo”, increpou ao agresor, momento en que este tamén lle apuntou co revolver. Esta persoa botou a correr mentres o acusado realizaba outro disparo, sen conseguir darlle. A continuación, José Luís L.P. deuse á fuga.

Máis tarde, axentes da Policía Nacional localizaron o home, pero cando foron detelo, meteu a man nunha bandoleira “con intención de sacar o revólver e dispararlles”, polo que se abalanzaron sobre el para tentar que soltase a arma. Para conseguilo, precisaron axuda doutros efectivos de Policía Nacional e Local.

Unha vez en dependencias policiais, o home continuou con actitude moi agresiva cara aos axentes, tirándose ao chan e negándose a baixar do vehículo. Da mesma maneira, tentou agredir con patadas e morder aos policías que lle custodiaban, aos que ademais lles dixo: “Carcereiros, falanxistas, cortareivos a cabeza”.

A Fiscalía entende que o acusado cometeu os feitos en plenas facultades e engade que non quedou acreditado que inxerise bebidas alcohólicas que limitasen a súa capacidade de discernir.

PENAS

Por iso, pide para el 20 anos de cárcere por un delito de asasinato, 10 por intento de asasinato, 10 por homicidio en grao de tentativa e 2 anos por tenencia ilícita de armas. Ademais, aplica a agravante de reincidencia en relación con este último delito, posto que xa foi condenado en catro ocasiones anteriores por tenencia ilícita de armas ou delito de arma prohibida.

Reclama, así mesmo, que se lle prohiba comunicarse e achegarse a menos de 200 metros dos parentes da vítima durante 30 anos; e coa persoa á que tentou disparar durante 20 anos. A maiores, pide que se lle prive do dereito á tenencia e porte de armas por tempo de cinco anos, e que indemnice aos familiares do falecido na cantidade que corresponda.