O alcalde de Vigo, Abel Caballero, volveu a garantir este mércores a permanencia na cidade da oficina do Instituto Social das Forzas Armadas (ISFAS), e aclarou que “xa se verá” a súa localización, sen descartar que siga no actual local de Gran Vía, ou se traslade a outro local facilitado polo Concello.

O rexedor fixo estas manifestacións tras manter un encontro co secretario xeral do ISFAS, José Ramón Praza, e insistiu, tras falar con el e ter varias conversacións nos últimos días coa ministra de Defensa, Margarita Carballos, en que o ISFAS “seguirá en Vigo atendendo aos 4.000 usuarios” aos que xa presta servizo.

Caballero criticou o intento do PP de “politizar” un suposto peche desa oficina, xerando “inquietude” entre os usuarios, pero subliñou que ese intento está “anulado”. “O problema está definitivamente resolto porque o alcalde de Vigo falou coa ministra”, proclamou e engadiu que non permitirá “que ningunha delegación se vaia xamais de Vigo”.