Marea de Vigo instou ao Concello da cidade olívica a anular os títulos honoríficos e as distincións concedidas pola corporación local durante o transcurso da Guerra Civil e a posterior ditadura franquista.

Nun comunicado, a formación criticou a destinación de recursos públicos ao mantemento da “cruz fascista” situada no parque do Castro e afeou ao goberno local a “inexistente” política de recuperación da memoria histórica.

Por esta razón, apostou por identificar os puntos chave de Vigo mediante placas explicativas que permitan realizar unha ruta da memoria histórica pola cidade. Así mesmo, instou ao Concello a crear unha comisión de traballo para analizar a concesión de distincións durante a ditadura para “invalidar” os recoñecementos outorgados a personalidades ligadas ao réxime.

Ademais, o portavoz do grupo municipal, Rubén Pérez, lamentou que os cidadáns novos de Vigo descoñezan feitos como a existencia de que a fortaleza do Castro foi empregada como cárcere e zona de fusilamentos. Tamén lembrou a resistencia con barricadas dos veciños da parroquia de Lavadores ante o levantamento de 1936 e a existencia dun frontón empregado como campo de concentración durante os primeiros días da sublevación en cálea María Berdiales.