PSA Vigo da pasos contra a contaminación: producirá o Opel Combo eléctrico desde 2021

A factoría ensamblará 400.000 vehículos este ano, un 0,5% máis.

PSA Vigo/ Miguel Núñez

A factoría que o Grupo PSA mantén en Vigo producirá a versión eléctrica do Opel Combo a partir de 2021, segundo anunciou este mércores o director da planta, Ignacio Bueno, en rolda de prensa.

PSA iniciou en xullo do ano pasado a produción en serie da nova xeración dos seus vehículos comerciais lixeiros, entre eles o Combo, o primeiro vehículo de Opel que se ensambla na instalación galega tras a súa integración no grupo francés.

Case un ano despois, Bueno afirmou que a factoría está a traballar xa no proxecto de industrialización para acoller a fabricación do Opel Combo eléctrico. En Vigo, xa se produce o Citroën Berlingo eléctrico.

O Combo de combustión interna fabrícase na liña 2 da factoría viguesa sobre a plataforma EMP2. Ao ano saen 45.000 unidades da planta (200 unidades diarias) e o 87% expórtase a outros mercados, con Alemaña como principal destino, por diante de Reino Unido, España, Italia e Francia.

En total, PSA Vigo ensamblará ao redor de 400.000 vehículos en 2019, o que suporá un incremento do 0,5% en comparación coas 398.000 unidades que ensamblou en 2018. Da liña 1 saen os modelos Peugeot 301 e o Citroën C-Elysée e da 2 os Citroën C4 Space Tourer (cinco e sete portas) e Berlingo; os Peugeot Rifter e Partner e o Opel Combo (nas súas versións Life e Cargo).

Bueno destacou que 2020 debe ser o mellor ano da historia da planta. “Temos todos os ingredientes para conseguilo. Se a economía mantense, temos capacidade suficiente, mesmo eléctrica”, apuntou.

O consorcio automobilístico francés investiu 108 millóns de euros para a produción da familia K9: Citroën Berlingo, Peugeot Rifter, Opel Combo e a nova furgoneta a planta producirá para Toyota desde finais deste ano.

PSA cifrou en máis de 1.000 millóns de euros anuais o volume de negocio que prevé a partir do ano 2020 para as empresas de compoñentes de Galicia polos novos modelos K9 e V20, dos que estima que 650 millóns de euros a anuais se atribuirán ao K9 e o resto ao V20.

Doutra banda, Bueno asegurou que a planta de PSA en Vigo non se verá afectada pola saída de Reino Unido da Unión Europea, a pesar de que exporta a Reino Unido entre un 12% e 15% do seu volume produtivo.

“O Brexit pode ser un gran problema para todos os fabricantes. O certo é que non hai un gran risco no fluxo (de compoñentes) cara á a planta. A maioría dos nosos provedores está na Península. O principal problema son as exportacións”, indicou.

De feito, afirmou que, como centro de produción, PSA Vigo non ten a necesidade de adoptar medidas que contrarresten o Brexit por agora. “Seguímolo moi de preto, pero a nós afectaríanos moi pouco”, sentenciou.