A Plataforma pola Defensa da Ría de Vigo expresa o seu rexeitamento “absoluto” á ampliación do peirao de Bouzas

Asteleiros de Bouzas © Miguel Nuñez

A Plataforma pola Defensa da Ría de Vigo ‘Cíes’ expresou este xoves o seu rexeitamento “absoluto” e “frontal” a “calquera recheo sobre a lámina de auga” na baía viguesa e, por tanto, á intención do Porto de ampliar en 65.000 metros cadrados o peirao de Bouzas.

Esta organización lamentou que, con ese proxecto, os estamentos públicos “optan por xerar simplemente riqueza á conta dos recursos, coma se estes fosen infinitos”. Por iso, rexeitou “calquera obra que a Autoridade Portuaria proxecte facer e que signifique algunha perda de valor ambiental da ría, dos recursos mariños, de postos de traballo en pesca e marisqueo, de turismo, de calidade de vida e, por suposto, alteracións na configuración natural” da ría.

A plataforma ‘Cíes’ precisou que “xamais” se oporá ao “progreso sustentable”, pero si a “calquera recheo sobre a lámina de auga da ría de Vigo e o seu ámbito litoral”. “Achegamos solucións para participar dese progreso propondo o desenvolvemento total da Plisan (en Salvaterra-As Neves) para que funcione como porto seco, tal como foi concibido, e que se dote dunha liña ferroviaria co porto de Vigo e os polígonos industriais”, sinalaron, e engadiron: “Esta si é unha actuación prioritaria e de futuro”.

Finalmente, lembraron a “perda dos mellores bancos marisqueiros da ría, desaparecidos polo actual recheo de Bouzas”, e insistiron en que están “obrigados a denunciar e condenar publicamente este tipo de proxectos que arruínan o futuro da humanidade”.