A Xunta quere que haxa unha nova edición do Marisquiño en Vigo

O concelleiro de Cultura, Román Rodríguez apunta que se aumenta a dotación do ano pasado, pero non revela cifras, á espera do que decida a organización.

O conselleiro de Cultura, Román Rodríguez, co director do festival do Marisquiño / xunta.gal

O conselleiro de Cultura, Román Rodríguez, comprometeu este mércores o investimento da Xunta necesaria para garantir que continúe a celebración do festival O Marisquiño en Vigo.

Tras reunirse co director do festival, Joako Ezpeleta, o conselleiro asegurou que a Xunta fixo unha proposta “xenerosa”, porque cre “importante” que “se manteña en Vigo” esta cita. Por iso, realizouse “unha oferta que cumpre coas expectativas que reclama a organización”.

Aínda que non quixo revelar cifras, o conselleiro explica que o apoio deste ano “algo mellora” o do ano anterior, no que a Xunta destinou uns 50.000 euros. Serán “dous terzos” pola vía directa e o outro terzo por patrocinio. “Queremos que O Marisquiño deste ano se celebre, por parte da Xunta non vai quedar”, aclara Román Rodríguez.

Todo iso, despois do accidente do ano pasado que deixou centenares de feridos tras o derrubamento dun tramo do paseo nunha das dársenas do porto de Vigo. O obxectivo é que “poida celebrarse sen ningún tipo de contratempo e do que se fale realmente de O Marisquiño é do deporte urbano e da cultura urbana”.

O conselleiro define este encontro mantido en Santiago como “unha reconciliación”, despois de que a finais do ano pasado a organización mostrase a súa insatisfacción co respaldo do Goberno galego á celebración do evento en 2019.

AGORA DEBERÁ DECIDIR A ORGANIZACIÓN

A organización ten previsto tomar a decisión na tarde deste mércores sobre se leva adiante a edición deste ano do festival. O conselleiro de Cultura di que o seu “desexo é que se celebre”. “Ao final o que terá que tomar a decisión última é o organizador”, agrega.

Sobre a localización física do evento, o conselleiro di descoñecer onde levará a cabo no caso de que se celebre, xa que iso “non incumbe” á Xunta e prevé que, de ter luz verde, sexa en época estival.