Os dous responsables dun club de alterne de Vigo enfróntanse a unha petición de pena de 3 anos de cárcere cada un, acusados dun delito contra os dereitos dos traballadores, por ter a varias empregadas no local sen estar dadas de alta na Seguridade Social.
Así, a xerente do local (e administradora da sociedade), N.P.V., e o cogerente do mesmo, D.F.R., serán xulgados este mércores na sección quinta da Audiencia Provincial de Pontevedra, con sede en Vigo.
Segundo o escrito de acusación da Fiscalía, ambos os acusados, de común acordo, tiñan traballando no local a varias mulleres que exercían actividades do alterne, e que non estaban dadas de alta na Seguridade Social.
En novembro de 2017, sinala o escrito, había 11 empregados no local: un camareiro, unha camareira, un porteiro e 8 mulleres que exercían actividades de alterne. Destas últimas (de varias nacionalidades), só unha traballadora estaba dada de alta na Seguridade Social.
Por estes feitos, o ministerio público acusa a N.P.V. e D.F.R. dun delito contra os dereitos dos traballadores, e pide para cada un deles unha pena de 3 anos de cárcere. Así mesmo, reclama que a muller pague unha multa de 3.600 euros, e que o local sexa clausurado por un período de 5 anos, ademais de que indemnicen á Seguridade Social polas cotas non satisfeitas.
O xuízo celebrarase o mércores 27 na Audiencia Provincial de Pontevedra, na sección de Vigo, ás 09,45 horas.