O grupo municipal Marea de Vigo presentará unha moción para o seu debate no próximo pleno, na que insta a pedir ás administracións central, autonómica e local medidas para protexer aos menores antes a proliferación de salas de apostas e salóns de xogo, e para limitar a súa instalación en espazos próximos a centros educativos, culturais, ou xuvenís, ademais de controlar a súa publicidade.

Nunha rolda de prensa, o portavoz do grupo, Rubén Pérez, expresou a “preocupación” de Marea polo aumento deste tipo de establecementos, e lembrou que, nas últimas reunións da Xerencia de Urbanismo, deuse licenza para dúas deste tipo de locais, un na rúa Colombia e outro no barrio de Navia, ao que se suma a sala de casino no centro comercial A Laxe.

Pola súa banda, a portavoz da asociación Distopía, Elisa Pérez, subliñou que o perfil do ludópata cambiou, e pasou de ser unha persoa de entre 40 e 55 anos, que xoga presencialmente, a ser un menor de 30 anos, que xoga ‘en liña’.

Mentres, o representante da Federación Española de Xogadores de Azar Rehabilitados, Juan José Lamas, apuntou que o xogo de azar “move 40.000 millóns de euros”, por iso ás administracións, que “forman parte do lobby”, non lles interesa ser estritos na súa regulación, a pesar das posibles “consecuencias patolóxicas”.

No caso de Galicia, onde “a falta de control é total”, sinalou, “calquera mozo pode acceder a un bar e facer unha aposta porque ninguén lle pide o DNI”.

E os concellos, engadiu, “non poden evadir a cuestión” porque, aínda que non teñan competencias na normativa sobre o xogo, son os que outorgan a licenza e poden “inspeccionar” que non se cometan “ilegalidades”. En Vigo, precisou, hai 11 salas de apostas e “máis de 700 máquinas auxiliares de apostas deportivas” noutros tantos establecementos.