Fiat Chrysler e PSA amplían ata 2023 a súa colaboración en materia de vehículos comerciais

As dúas empresas aumentarán a produción na factoría de Sevel

Traballo en PSA/ Arquivo de PSA

Os grupos automobilísticos Fiat Chrysler Automobile (FCA) e PSA alcanzaron un acordo para ampliar ata 2023 a colaboración que manteñen para a fabricación de vehículos comerciais lixeiros, segundo informaron ambas as entidades.

As dúas empresas indicaron que colaboran de forma “exitosa” en materia de vehículos comerciais lixeiros desde hai 40 anos e apuntaron que, a través deste novo acordo, continuarán a fabricación dos modelos Fiat Ducato, Peugeot Boxer e Citroën Jumper.

Igualmente, as dúas corporacións levarán a cabo unha produción adicional para cubrir as necesidades das marcas Opel e Vauxhall. Así, incrementarán a capacidade de produción da factoría de Sevel (Italia) desde 2019, “co reforzo potencial de equipos adicionais” para responder o aumento previsto da demanda.

Doutra banda, acordouse tamén o uso, a medio prazo, de capacidade de fabricación complementaria do Grupo PSA para a montaxe de determinadas versións dos furgóns grandes de Peugeot, Citroën, Opel e Vauxhall.

A fábrica de Sevel inaugurouse en 1981 e conta na actualidade cun persoal formado por 6.200 traballadores que se dedican á produción de vehículos comerciais lixeiros. Este centro conta cun centro de formación de alto nivel.

DEIXAR UN COMENTARIO

Please enter your comment!
Please enter your name here