A UVigo estuda abrir un expediente disciplinario á alumna que supostamente golpeou ao seu profesor

Profesor e alumna denúncianse mutuamente no xulgado de garda.

Referéndum da monarquía na UVigo/ Miguel Núñez

A Universidade de Vigo informou de que dispón dun trámite de información reservada, un mecanismo previo á posible apertura dun expediente disciplinario, e que non descarta activar con respecto á suposta agresión dunha alumna a un profesor da Facultade de Económicas.

Así o trasladaron a Europa Press fontes da institución académica, que explicaron que este mecanismo é un proceso de recabación de información e que é o paso previo á apertura, se procedese, dun expediente disciplinario que pode “acabar en diversas sancións, dependendo da gravidade do asunto”.

En todo caso, a Universidade de Vigo recalcou que respectará “escrupulosamente” as dilixencias policiais e xudiciais xa abertas, así como as consecuencias que estas teñan no posible procedemento administrativo sancionador.

A suposta agresión produciuse este xoves no despacho dun profesor desta facultade. Segundo o docente, unha alumna e a súa nai presentáronse alí e iniciaron unha discusión por non estar de acordo coa nota dun exame.

O home relatou á Policía Local que nai e filla subtraéronlle as chaves e encerrárono no despacho e que, posteriormente, cando el logrou abrir (tiña unha copia das chaves) volveron presentarse alí e de novo increpárono. Segundo a versión do profesor, nese momento, a alumna golpeouno cun paraugas, mentres a nai agarrábao.

Fontes do Tribunal Superior de Xustiza de Galicia (TSXG) confirmaron que o docente presentou denuncia no xulgado de garda (instrución número 4) contra a alumna e a súa nai por un suposto delito de atentado, polas “ameazas” e “agresión”.

Pola súa banda, a estudante tamén presentou denuncia no xulgado vigués, e sostén que o profesor a agarrou pola camisa, e que por iso lle golpeou co paraugas.