A Policía Local de Vigo volveu a identificar o veciño de 79 anos de idade que xa fora interceptado o pasado domingo, cando varias testemuñas o sorprenderon raiando coches e introducindo escarvadentes de madeira nas fechaduras.

Segundo informaron fontes policiais, ao día seguinte dese incidente, unha dotación do 092 volveu ir ao barrio do Calvario, tras recibir un aviso de que un home maior estaba a meter escarvadentes nas fechaduras das portas dos turismos estacionados.

Os axentes volvérono a identificar unha vez máis (xa que son numerosas as intervencións policiais relacionadas coa actividade supostamente delituosa deste home) e requisáronlle varios obxectos de madeira.

Segundo informou o 092, no que vai de mes de xaneiro atribúenselle a este home danos nuns 120 coches, e ten máis dunha ducia de antecedentes policiais por estes feitos, e por agredir a veciños que lle recriminan a súa actitude.