O Consello Galego de Economistas premia a PSA Citroën Vigo pola “creación de emprego de calidade”

Vázquez Taín destacou que o Grupo PSA en Vigo contribuíu "á mellora da sociedade a través de numerosas accións de patrocinio e mecenado que levan a cabo na súa contorna".

PSA Vigo/ Miguel Núñez

O Consello Galego de Economistas distinguirá este venres á fábrica de Vigo do Grupo PSA Peugeot-Citroën co Premio Economía. Este galardón, de recente creación, pretende poñer en valor aos actores transcendentais no desenvolvemento da economía de Galicia, segundo informou a entidade.

O acto de entrega terá lugar este venres día 25, a partir das 20,00 horas, no auditorio de Afundación en Vigo e estará presidido pola presidenta do Congreso dos Deputados, Ana Pastor.

A entrega do galardón tamén contará coa presenza do titular da Xunta de Galicia, Alberto Núñez Feijóo; o alcalde de Vigo, Abel Caballero; o presidente do Consello Xeral de Colexios de Economistas de España, Valentín Pich Rosell; e o presidente do Consello Galego de Economistas, Miguel A. Vázquez Taín.

“Decidimos poñer en marcha este premio para recoñecer publicamente ás empresas ou proxectos que contribuíron e contribúen, grazas á súa traxectoria consolidada no tempo, de forma determinante ao crecemento económico de Galicia”, trasladou Vázquez Taín.

O presidente do Consello Galego de Economistas destacou que Citroën “non só foi un dos motores do PIB de Galicia” senón que “xerou emprego directo de calidade e propiciou a creación dunha potente industria auxiliar”.

Ademais, Vázquez Taín destacou que o Grupo PSA en Vigo contribuíu “á mellora da sociedade a través de numerosas accións de patrocinio e mecenado que levan a cabo na súa contorna”.