Abel Caballero calcula que as luces de Nadal deixaron uns ingresos 25 veces superiores ao custo da iluminación

Cifra nuns 2 millóns as persoas que pasaron polo centro da cidade.

Espectáculo de inauguración das Luces en Vigo/ Miguel Núñez

A iluminación do Nadal e a afluencia de persoas que orixinou supuxo un retorno económico á cidade de Vigo de máis de 20 millóns de euros, segundo estimou o alcalde, Abel Caballero, que cifrou en máis de 2 millóns as persoas que, entre finais de novembro e mediados de xaneiro, mobilizáronse na cidade.

Así o trasladou o rexedor nunha rolda de prensa na que tachou de “éxito excepcional” a programación municipal de Nadal, e na que fixo balance de visitas, ocupación hostaleira e repercusión deste evento.

Segundo os seus cálculos, eses 2 millóns de persoas deixaron en Vigo ingresos que multiplican “por máis de 25” o custo da iluminación (uns 830.000 euros). “E iso sen contar a publicidade e aparición nos medios de comunicación”, apostilou Abel Caballero, quen sinalou que a afluencia de vehículos á cidade creceu en 250.000 coches e buses máis que o ano pasado.

Espectáculo de inauguración das Luces en Vigo/ Miguel Núñez

O alcalde subliñou que “unhas 40.000 persoas de 36 países” seguiron en directo o aceso das luces por televisión, incluída a BBC One, ou por redes sociais.

Por outra banda, destacou que os trens con chegada a Vigo tiveron unha ocupación do cento por cento os fins de semana e que a media de ocupación das conexións aéreas estivo entre o 63 e o 86 por cento segundo as liñas.

Con respecto aos hoteis, Abel Caballero aseverou que a ocupación media foi do 67 por cento, e que ascendeu ao 85 por cento nos fins de semana, “con picos do 95 por cento e cento por cento”. Segundo subliñou, “subiu en 30 puntos a ocupación con respecto ao ano pasado”.

Espectáculo de inauguración das Luces en Vigo/ Miguel Núñez

No caso da hostalería, o alcalde apuntou que o volume de negocio aumentou nun 50 por cento con respecto ao ano 2017 e tamén se incrementou a actividade comercial, nalgúns casos, ata nun 20 por cento.

Abel Caballero apostou por “aproveitar” ese éxito e repercusión, para afianzar Vigo como destino turístico, o que cualificou como “reto”.

No entanto, o alcalde tamén incidiu en que “houbo factores negativos”, como “o intento de Feijóo de devaluar a imaxe da cidade” e “o PP de Vigo facendo o mesmo”.

Espectáculo de inauguración das Luces en Vigo/ Miguel Núñez