Efectivos da Policía Científica e da Comisión Xudicial permanecen na leira da parroquia viguesa de Sárdoma na que vive o home detido o pasado xoves como presunto autor da morte do seu pai, Manuel A.R., de 81 anos de idade.
O home detido foi trasladado á leira familiar ao mediodía deste sábado, para presenciar, acompañado do seu avogado (un letrado de Ourense), o rexistro do seu domicilio e a inspección da leira onde tamén está a vivenda do falecido.
Tras máis de catro horas de inspección a Policía fixo un receso sobre as 16,00 horas, e renovou pasadas as 18,00 horas o rexistro. O detido, tras o receso, foi trasladado novamente ao domicilio onde permanece.
O arresto prodúcese despois de que durante un rexistro na vivenda do seu pai o home acabase confesando que o matou no transcurso dunha discusión. Está previsto que o presunto parricida pase a disposición xudicial este domingo.
O corpo de Manuel A.R foi localizado o pasado 7 de xaneiro por dous veciños a uns 600 metros da súa vivenda, cerca do río Eifonso. O corpo estaba tapado con vexetación, plásticos e trapos, e cos pés descalzos suxeitos cun cinto.
