O alcalde de Vigo, Abel Caballero, criticou este mércores que a Xunta de Galicia solicite a licenza para construír o centro de saúde de Bouzas “sen ter o proxecto de execución nin dispoñibilidade de crédito”, con 10 anos de atraso (con respecto a cando se lle cederon os terreos) e “xusto antes das eleccións municipais”.
Nunha rolda de prensa, o rexedor olívico recordou que o Concello expropiou os terreos e cedeu o espazo á Xunta para a construción desa dotación sanitaria en 2008 e que, ata agora, non só non a construíu, senón que “polo camiño” pechou o centro de saúde da Casa do Mar.
“E de súpeto presentan unha petición de licenza para a metade de superficie”, denunciou, e engadiu que “nin sequera poden empezar porque non teñen o proxecto de execución nin dispoñibilidade de crédito, porque non hai unha partida nos orzamentos para o centro de saúde de Bouzas”.
Abel Caballero afirmou que, nesas circunstancias, “non é crible” o anuncio da Xunta de que construirá o centro de saúde. “Témonos que temer que é un engano. Sen proxecto, sen diñeiro, por que lles imos a crer?”, apuntou o alcalde, quen engadiu que o Sergas pediu a licenza “xusto antes das eleccións municipais”.
Pola súa banda, a portavoz do grupo municipal do PP, Elena Muñoz, proclamou que Bouzas “por fin” vai ter o seu centro de saúde, cun proxecto “acordado” cos veciños e lamentou que “parece que ao alcalde lle molesta”.