Un total de 20 feridos tras envorcar un autobús en Oia

Bus de Atsa envorcado en Oia cando levaba traballadores de CitrÖen / Remitida.

Un autobús envorcou a últimas horas deste martes, 8 de setembro, en Mougás, Oia, provocando unha vintena de feridos, algúns deles, ata oito, foron trasladados a distintos hospitais, a maioría, ao Álvaro Cunqueiro.

Segundo informan fontes consultadas por Galicia Confidencial, o autobús prestaba un servizo discrecional para traballadores de Citröen (PSA) que regresan da factoría ata a Guarda.

O motivo do accidente tería sido un animal, probablemente un cabalo, que se cruzou na estrada. O impacto con este animal tería provocado a saída do vehículo e que acabara envorcando.

En concreto, segundo fontes de emerxencias, o suceso tivo lugar pouco antes das 23,00 horas, no quilómetro 26 da estrada PO-552, que une Vigo coa Guarda, concretamente ao seu paso pola parroquia de Mougás.

Segundo a información do 112-Galicia, a maioría dos pasaxeiros lograron saír polo cristal traseiro do vehículo polo seu propio pé, polo que non foi necesaria a intervención dos Bombeiros de Baixo Miño, que foran alertados.

A maior parte dos feridos, os máis leves, foron trasladados nun autocar da mesma compañía ata o centro hospitalario de referencia, mentres que os que presentaban lesións de máis consideración, un total de sete, foron en ambulancias ata distintos hospitais.

DEIXAR UN COMENTARIO

Please enter your comment!
Please enter your name here