A Garda Civil investiga a un home por incitar a un menor a comprar drogas. O operativo levouse a cabo esta semana no municipio pontevedrés de Covelo, e permitiu non só frustrar as intencións do varón, senón evitar que “captase” a máis novos para poder satisfacer as súas necesidades de estupefacientes e que introducise a outros menores na súa rede.
A investigación foi posible grazas á colaboración do mozo e da súa familia xa que, en canto o adulto contactou con el para ofrecerlle o “negocio ilícito”, a vítima advertiu aos seus proxenitores, que á súa vez puxeron o caso en coñecemento da Garda Civil.
Varias testemuñas puideron ratificar os feitos denunciados. Ao home investígaselle por inducir ou favorecer o tráfico de drogas a un menor. Trátase dun delito contra a saúde pública agravado.
Este operativo enmárcase no Plan Estratéxico de Resposta Policial deseñado pola Secretaría de Estado e Seguridade, para previr e combater o tráfico minorista e o consumo de drogas nas zonas de lecer e diversión.
O Plan recolle unha serie de actuacións que as FCSE desenvolverán para incrementar a presión sobre quen desenvolven estas actividades ilegais e impedir e erradicar o tráfico ilícito de drogas nos espazos utilizados polos cidadáns para o lecer.