A Policía Local de Vigo detivo este pasado domingo a un home, M.D.D.A.G., de Portugal e 30 anos de idade, tras supostamente apalpar e dar unha palmada nas nádegas a unha moza, tamén portuguesa e 23 anos de idade.
Foi na rúa Inés Pérez de Zeta cando os axentes foron requiridos por un home, que lles informou de que un grupo de persoas tiña retido a un home nas proximidades. Unha vez alí, atopáronse cunha muller “moi alterada e nerviosa”, que manifestou que o home lle deu unha palmada no cu e a apalpara.
O home, que estaba a ser agarrado por outras dúas persoas, logrou zafarse e emprendeu a súa fuxida, sendo alcanzado a poucos metros. Despois de que testemuñas dos feitos apoiasen a versión da vítima, o home foi detido como presunto autor dun delito de agresión sexual.
