Liberdade provisional e orde de afastamento para unha detida por ameazar ás súas tías cunha pistola en Redondela

A Policía atopouna atrincheirada na vivenda e comprobou que a pistola era de fogueo

Armas intervidas a unha moza que foi detida en Cesantes (Redondela) tras ameazar cunha pistola as súas tías para roubarlles os teléfonos móbiles.. POLICÍA NACIONAL-COMISARÍA DE VIGO-REDONDELA

O xulgado de instrución número 2 de Redondela  acordou a posta en liberdade provisional dunha muller detida o pasado martes na parroquia redondelana de Cesantes, tras ameazar supostamente ás súas tías cunha pistola.

A muller está investigada por un delito de ameazas, e o xulgado acordou, así mesmo, imporlle como medida cautelar a prohibición de comunicarse e achegarse ás presuntas vítimas. Axentes da Policía Nacional da Comisaría de Vigo-Redondela detiveron o pasado martes a esta moza na zona de Cesantes, como suposta autora dun roubo con violencia e ameazas graves a dous familiares.

Segundo informaron fontes policiais, os feitos ocorreron pola tarde, cando o 091 recibiu un aviso sobre unha muller que ameazara cun arma de fogo ás súas dúas tías no interior dunha vivenda de Cesantes, e rouboulles os teléfonos móbiles.

Ao chegar ao lugar, os axentes entrevistáronse as vítimas que, moi nerviosas, explicaron que lograran fuxir e refuxiarse na vivenda dun familiar, despois de recibir ameazas por parte dunha sobriña, que tiña un arma de fogo e que se levou os seus teléfonos.