Asasinado a tiros un porriñés nun intento de roubo do seu coche en México

Ocorreu na colonia Las Huertas, na cidade de Naucalpan.

Colonia Las Huertas, na cidade de Naucalpan (México) / Google Maps.

Un mozo natural do Porriño, Sergio Fernández, faleceu ao ser tiroteado nun intento de roubo do seu coche na colonia Las Huertas, na cidade de Naucalpan (México), país no que residía, segundo informan medios locais mexicanos.

O alcalde do Porriño, Alejandro Lorenzo, expresou que os veciños do concello están “apenados” pola morte dunha persoa “moi coñecida” que “tiña moitos amigos aquí”.

Destaca que tiña un “palmarés moi importante” como fisioculturista, ademais de traballar como adestrador persoal e montar o seu propio ximnasio en México. No país americano tiña un fillo pequeno cunha moza mexicana.

O rexedor explica que trasladou as súas condolencias á familia da vítima, cuxos pais residen no Porriño. “Sentimos moito que perdemos un veciño do noso concello”, explica.

Sobre o suceso, o alcalde indica que se cre que o porriñés “saía do seu ximnasio” cando tentaron roubarlle coche, “enfrontouse un pouco a eles e pasou esta desgraza do asasinato”.

O Concello do Porriño colocou as bandeiras a media hasta e gardarase un minuto de silencio no pleno desta tarde de mércores.

DEIXAR UN COMENTARIO

Please enter your comment!
Please enter your name here