O porto de Vigo recibirá este venres un veleiro que navega escoltado polo buque de Vixilancia Aduaneira ‘Petrel’ e que foi interceptado cuns 2.000 quilos de cocaína en augas do Atlántico Norte.
Aínda que non transcenderon detalles da operación, sábese que se trata dun dispositivo conxunto despregado por Vixilancia Aduaneira e polo GRECO da Policía Nacional (con axentes de Galicia e de Andalucía), desenvolvido no mar e na zona da Costa do Sol.
Froito das investigacións foron detidos os dous tripulantes do veleiro e outro tres persoas, membros dunha organización dedicada ao narcotráfico e afincados en localidades da provincia de Málaga.
O veleiro foi abordado en augas do Atlántico Norte cando se dirixía a España e está previsto que, á súa chegada ao porto de Vigo, procederase ao rexistro da embarcación e á pesada da droga por parte da comisión xudicial.
