A Garda Civil investiga penalmente a un veciño de Tomiño como presunto autor dun roubo con forza que supostamente cometera nun colexio do municipio, do que subtraeu uns proxectores e ferramentas, efectos que foron recuperados.
Segundo informou o Instituto Armado, as investigacións iniciáronse a principios deste mes cando o Posto da Garda Civil de Tomiño tivo coñecemento dun roubo con forza que se perpetrou no CEIP Aurora del Porvenir, de onde levaron un proxector e varias ferramentas que utilizaban os operarios do servizo de mantemento.
“A pericia da inspección ocular realizada no lugar dos feitos polos compoñentes do Equipo de Investigación da Compañía da Garda Civil de Tui permitiu a identificación do presunto autor, en cuxo poder se recuperaron todos os efectos que supostamente subtraera”, destacou a Benemérita.
En concreto, trátase dun veciño de Tomiño, de 33 anos, con antecedentes policiais, que foi notificado da súa condición de investigado como presunto autor dun delito de roubo. As dilixencias instruídas entregáronse no xulgado de Instrución de garda de Tui, onde deberá comparecer cando sexa requirido pola autoridade xudicial.
