Unha persoa faleceu no mediodía deste venres ao chocar frontalmente o coche sen carné no que circulaba contra un camión formigoneira, cuxo ocupante resultou ileso, no concello de Tomiño.
Segundo informou o 112 Galicia, foi necesario que os Bombeiros do Baixo Miño empregasen o material de excarceración para liberar a vítima, que quedou atrapada no interior do vehículo.
O sinistro produciuse á altura do punto quilométrico 1 na estrada PO-344, sobre as 12,30 horas deste venres, indicaron as mesmas fontes.
Varias persoas particulares contactaron co 112 Galicia para alertar do accidente e, tras ter constancia, o Centro Integrado de Atención ás Emerxencias 112 Galicia pasou o aviso a Urxencias Sanitarias de Galicia-061, que, a pesar dos esforzos, non puideron facer nada por salvarlle a vida.