Detidos seis veciños do Morrazo por tráfico de drogas

A Garda Civil desactivou tres puntos de venda en Bueu e Cangas.

Efectos subtraídos en varios operativos da Garda Civil con seis detidos do Morrazo por venda de estupefacientes polo miúdo.. GARDA CIVIL

A Garda Civil detivo a seis persoas veciñas do Morrazo no marco das súas actuacións e vixilancias para previr e tratar de erradicar a venda ao por menor de sustancias estupefacientes nos municipios de Bueu e Cangas, nos que desactivou tres puntos.

Segundo informou o Instituto Armado, a identificación dos ocupantes dun vehículo foi o detonante dunha das actuacións. Sucedeu o pasado día 29 cando a Garda Civil, con ocasión dun dispositivo preventivo na estrada Bueu-Cela, identificou a unha parella que lle “resultou sospeitosa”. Esta circunstancia, unido aos seus antecedentes policiais fixo que se establecese un dispositivo de investigación ao redor dos ocupantes deste vehículo, para o que contaron coa colaboración da Policía Local de Bueu, que foi alertada da incidencia.

Horas despois unha patrulla da Policía Local localizou o vehículo cando estaba a estacionar nunha céntrica rúa de Bueu e interceptaron a un dos ocupantes que abandonaba “de forma precipitada o coche ao decatarse da presenza dos axentes, mentres que a acompañante saíu correndo”, destacaron as mesmas fontes.

No rexistro superficial que se lle realizou, co apoio dunha patrulla de seguridade cidadá da Compañía da Garda Civil de Pontevedra que integraba o dispositivo, intervéuselle un paquete con 16 envoltorios de plástico que contiñan 10 gramos de cocaína e 15 de heroína. Os dous ocupantes do vehículo, tanto o condutor como o seu acompañante, de 34 e 38 anos, respectivamente, ambos de Bueu, foron detidos como presuntos autores dun delito contra a saúde pública, por tráfico de drogas.

SEGUNDA ACTUACIÓN

Noutra das actuacións, a Garda Civil desactivou un punto de venda e distribución de drogas que se realizaba nunha vivenda na mesma localidade de Bueu. Despois de constatar a afluencia de consumidores habituais de droga na zona, realizouse unha entrada e rexistro no domicilio, autorizada polo Xulgado de Instrución número 2 de Marín.

Os axentes interviñeron útiles para a preparación das doses, básculas de precisión e numerosas anotacións cos resultados das vendas. Ademais, no momento do rexistro identificáronse a dous supostos toxicómanos que se atopaban no interior do inmoble realizando o consumo das sustancias e os dous responsables do inmoble foron detidos por un delito contra a saúde pública.

Ademais, o equipo de Policía Xudicial da Garda Civil de Cangas, levou a cabo un operativo que se iniciou hai algúns meses debido á alarma social xerada por un punto de venda polo miúdo moi activo na localidade, subliñou a Benemérita.

As mesmas fontes indicaron que alí se levaron a cabo distintas infraccións por vendas nun domicilio, así como en rúas céntricas da localidade, debido ao que se investigou a unha persoa, ao acharlle no seu vehículo 100 gramos de haxix.

A continuación solicitouse unha entrada e rexistro ao xulgado de garda de Cangas, e co apoio do GRS 7 de Pontevedra e o Servizo Cinolóxico da Garda Civil, interviñéronse sobre 100 gramos de cocaína, 70 de haxix, e útiles para a adulteración e preparación da droga, así como diñeiro en metálico.

Esta última intervención saldouse con dous detidos e dous investigados, aos que se lles atribúe un delito de tráfico de drogas.