O Coruxo Fútbol Club vén de comunicar con profunda tristura a súa desolación e incredulidade trala morte de Fabio Soto, xogador da categoría Xuvenil, en división Nacional, estando de vacacións cuns amigos na illa Delimara, en Malta, tras precipitarse por un acantilado.
O xogador do Coruxo desapareceu onte martes ao redor das 19:20 horas, momento no que os membros da Unidade de Intervención Rápida, Departamento de Protección Civil e as Forzas Armadas de Malta iniciaron unha procura en toda a zona e o perímetro sobre a praia de St. Peter’s Pool.
Segundo informan desde a páxina oficial do club, “a procura tivo que ser detida ao chegar a noite, pero os equipos de rescate regresaron esta mañá do mércores. Foi ao redor das 08:00 h. cando os membros das Forzas Armadas de Malta informaron á policía que se avistou un cadáver no fondo do mar, que foi identificado. A investigación policial está en curso coas autoridades xudiciais de Malta”.
