Rescatados tres mariñeiros en Cangas tras afundirse a súa embarcación ao chocar contra unha batea

Un deles precisiou de traslado ao hospital

Un avión de Salvamento Marítimo controla a zona para detectar posibles verteduras.. DELEGACION DO GOBERNO EN GALICIA

Os servizos de emerxencias rescataron este mércores aos tres mariñeiros do pesqueiro ‘Cacheira Segundo‘, que se afundiu fronte ao litoral de Cangas.

En concreto, segundo a información do CIAE 112-Galicia e da Delegación do Goberno, o suceso ocorreu ao oeste da praia de Areacova, onde a embarcación, na que viaxaban as tres persoas, chocou contra unha batea mentres regresaba ao porto de Aldán.

Os tres ocupantes foron rescatados por unha embarcación que se atopaba na zona e que os trasladou ata o porto. Un dos afectados tivo que ser trasladado ao Hospital Álvaro Cunqueiro de Vigo con “importantes lesións nunha perna”.

No operativo interviñeron o avión Sasemar 102 e a Salvamar Mirach de Salvamento Marítimo, o buque Irmáns García Nodal de Gardacostas, e efectivos de Protección Civil de Cangas, de Policía Local e de Garda Civil. Segundo informou a delegación do Goberno, activouse o plan de control de posible contaminación na zona.