Un motorista faleceu na noite deste martes no municipio de Vigo despois de que o vehículo no que circulaba chocase contra unha ambulancia na Avenida de Madrid. Segundo informou o 112 Galicia, os feitos sucederon nas proximidades da estación de autobuses, ao redor das 21,45 horas deste martes.
Unha persoa particular contactou co 112 Galicia para alertar do accidente, tras o que os xestores do Centro Integrado de Atención ás Emerxencias solicitaron a intervención de Urxencias Sanitarias de Galicia-061, aínda que nada puideron facer por salvarlle a vida ao motorista.
En concreto, o 061 enviou dúas ambulancias ao lugar para atender a tres persoas, dúas que foron levadas ao Hospital Povisa, o home D.A.A., de 41 anos, e a muller N.Q.B., de 26. Pola súa banda, tras realizarlle as manobras de reanimación confirmouse o falecemento no lugar do home S.J.A.P., de 50 anos.
Fontes sanitarias indicaron que no interior da ambulancia contra a que chocou a motocicleta ían dous técnicos, pero non trasladaba ningún paciente no momento do accidente. Ademais, por parte do CIAE 112 Galicia pasouse o aviso á Policía Local, aos Bombeiros de Vigo e a Protección Civil.
