A Garda Civil incautouse de 121 envases que contiñan 3.509 artificios pirotécnicos e que se atopaban á venda nun posto ambulante nunha festa en Gondomar.
Segundo informaron fontes do Instituto Armado, a incautación realizouse este xoves, nunha atracción de feira instalada no recinto da festa da parroquia gondomareña de Mañufe. Trátase de artefactos da categoría F2, que só poden venderse en establecementos autorizados, e a maiores de 16 anos.
A Garda Civil subliñou que este tipo de material, aínda que é “de baixo perigo e baixo nivel de ruído”, só pode utilizarse en zonas delimitadas. Os artificios, comisados por efectivos da Patrulla Fiscal e de Fronteiras, foron almacenados para a súa destrución nun depósito autorizado.
Fontes da Benemérita lembraron que a venda de artificios pirotécnicos sen autorización, como é o caso dos postos ambulantes, está tipificada como unha infracción grave ao Regulamento de Artigos Pirotécnicos e Cartuchería. O responsable do posto da festa de Gondomar foi identificado, e pode enfrontarse a unha sanción que oscila entre os 300 e os 30.000 euros.
