Un conductor bloque as portas do bus para evitar un atraco a un menor

A Garda Civil detén a dous mozos por un delito de roubo con violencia a un menor que viaxaba nun autobús de Vigo a Baiona.. GARDA CIVIL

A Garda Civil detivo a dous mozos das localidades pontevedresas de Nigrán e Gondomar como presuntos autores dun delito de roubo con violencia e intimidación a un menor de idade que viaxaba nun autobús que realizaba o percorrido Vigo-Baiona, ao que lle subtraeron unha carteira con 40 euros.

Segundo informou o Instituto Armado, os feitos sucederon no interior do autobús cando o menor foi abordado por outros dous mozos “que se sentaron estratexicamente ao seu lado coa intención de incordialo”.

“Desta forma comezaron a increparlle con insultos e ameazas pedíndolle que lles entregase o teléfono móbil e os auriculares cos que ía escoitando música”, destacou a Benemérita.

Coa súa resistencia, o menor conseguiu evitar que os seus agresores lle subtraesen o móbil e os auriculares, pero non así a carteira con 40 euros que levaba na mochila, “que lle arrebataron de forma violenta despois de propinarlle varios golpes na cabeza”, relataron as mesmas fontes.

Ante a demanda de auxilio do menor, o condutor detivo a marcha no centro urbano de Nigrán e viuse obrigado a bloquear as portas do autocar ata que chegou unha patrulla de Seguridade Cidadá do Posto Principal da Garda Civil de Baiona-Nigrán que procedeu á identificación dos presuntos agresores.

Estes resultaron ser dous mozos con antecedentes policiais, de 18 e 19 anos, veciños de Nigrán e Gondomar, respectivamente, confirmou a Garda Civil. Unha vez formulada a denuncia polo menor, os dous mozos foron detidos como supostos autores dun delito de roubo con violencia e deberán comparecer, cando sexan citados, no Xulgado de Instrución número 1 de Vigo, onde foron entregadas as dilixencias instruídas.