O home do Porriño que supostamente matou á súa muller e se suicidou deixou unha nota de despedida

A muller presentaba dous impactos na cabeza e un nas costas, e el un disparo no peito. Todo parece indicar que foi un episodio de violencia machista.

Porriño Concello
Concello do Porriño / © Miguel Núñez.

O home que este luns supostamente matou á súa muller no Porriño deixou unha nota de arrepentimento e despedida antes de acabar coa súa vida, segundo comunicaron a Europa Press fontes próximas á investigación.

Así mesmo, a Garda Civil informou a Europa Press de que o home utilizou unha escopeta de caza, da que tiña os permisos e estaba legalizada, para cometer este acto. Así, a muller presenta tres impactos, dous na cabeza e un nas costas, e el un disparo no peito.

Estas mesmas fontes confirmaron que un dos fillos da parella atopou aos seus pais falecidos. Ademais, trasladaron que varias testemuñas confirmaron que había “desavinzas” entre o matrimonio, que cesara a súa convivencia poucas semanas antes.

O Instituto Armado mantén aberta a investigación, pero descarta a participación de terceiras persoas. Non constan denuncias previas por malos tratos no ámbito familiar, aínda que tanto a Garda Civil como o TSXG sosteñen que “todo indica que se trata dun caso de violencia machista”.

“É branco e en botella, todo apunta a outro episodio terrible da morte dunha muller a mans da súa parella, polo feito de que quería facer a súa vida en solitario ou tomar outros camiños”, selou a alcaldesa do Porriño, Eva García da Torre, antes de participar nunha concentración por estes feitos.

ACHADO DOS CORPOS

O achado dos cadáveres produciuse pouco antes das 15:00 horas deste luns no domicilio da parella, na parroquia porriñesa de Chenlo. Segundo apuntou o CIAE 112, ás 14:50 horas un fillo da parella chamou a emerxencias para alertar de que atopara aos seus pais mortos na vivenda familiar, no lugar das Filgueiras.

O 112 Galicia informou do ocorrido á Garda Civil, que desprazou axentes até o lugar e iniciou a investigación correspondente, coa hipótese principal de que se trata dun caso de violencia de xénero. Tamén se pediu apoio ao Grupo de intervención psicolóxica en catástrofes e emerxencias (Gipce), para dar atención psicolóxica aos familiares dos falecidos.