Detido por tentar arrebatarlle a arma a un axente en Vigo

Policía Local de Vigo / © Miguel Núñez.

Un home de 31 anos domiciliado en Vigo, L.J.C.A., foi detido por agredir a un axente que o separou dunha pelexa na que se viu involucrado na cidade olívica e tentar arrebatarlle a arma.

Os feitos tiveron lugar este martes sobre as 20,40 horas, cando unha patrulla da Policía Local observou unha pelexa entre tres homes na calzada da rúa Rosalía de Castro que afectaba o tráfico, segundo trasladaron fontes do corpo.

Os policías interviñeron para evitar que estes homes se causasen lesións de gravidade e, tras conseguir separalos, identificáronos e reestableceron a circulación do tráfico. Con todo, un destes homes mantivo unha actitude agresiva e comezou a increpar e a ameazar a unha muller que se atopaba na beirarrúa oposta.

Ademais, interrompeu de modo continuado o labor de filiación dos axentes, que tentaron tranquilizalo. Tamén incumpriu as advertencias que lle realizaron respecto ao mantemento das medidas de seguridade. Así, cando este home creu que un policía se atopaba distraído, abalanzouse sobre el e tratou de arrebatarlle a arma regulamentaria.

Finalmente, grazas ao apoio dun axente da Policía Nacional que paseaba pola zona, os funcionarios puideron reducir ao home, que mostrou unha forte resistencia activa. Deste xeito, foi detido pola suposta comisión dun delito de atentado a axente da autoridade e desobediencia grave.