Morre un home nunha praia de Moaña

Polo momento, descoñécense as circunstancias nas que se produciu o falecemento do bañista.

Moaña e a praia da Xunqueira / Xunta.

Un home faleceu este domingo nunha praia de Moaña  por causas que aínda se investigan, informaron fontes do 112, que explicaron que os socorristas do areal sacaron da auga a esta persoa en estado inconsciente e os servizos de emerxencia confirmaron pouco despois a morte.

O aviso do ocorrido foi recibido polo 112 ao redor das 18,00 horas. O persoal de vixilancia da praia da Xunqueira foi quen alertou de que o home necesitaba asistencia urxente.

Foron mobilizados profesionais do 061 e ao lugar desprazouse unha dotación a bordo do helicóptero con base en Santiago, que non puido facer nada por salvar a vida desta persoa.

Polo momento, apuntou o 112, descoñécense as circunstancias nas que se produciu o falecemento do bañista. Deuse aviso tamén á Garda Civil e a Policía Local.