Un home de 23 anos domiciliado na Ramallosa, en Nigrán, ao que lle constaba unha orde xudicial de procura, personación e detención, foi arrestado tras saltar un control na AG-57 á altura de Baiona e conducir sen dispor do correspondente permiso.
Ademais, este home e o seu acompañante, un home de 37 anos residente en Gondomar, foron denunciados por infrinxir o confinamento derivado do estado de alarma, segundo precisou nun comunicado a Garda Civil.
Aínda que os axentes deron o alto, o condutor non se detivo e fuxiu no coche a gran velocidade ata a primeira saída da autoestrada, onde chocou levemente contra o vehículo doutra patrulla que tentaba evitar a fuga.
Así, o turismo se reincoporou á autoestrada en dirección Baiona e, tras circular durante varios quilómetros, omitir as ordes dos axentes e tentar embestir contra as súas motocicletas, chocou contra os elementos de sinalización e protección da peaxe de Sabarís, en Baiona.
Posteriormente, os ocupantes do vehículo fuxido, que resultaron ilesos, foron detidos. Ademais, tras comprobar a documentación do condutor, os axentes observaron que carecía do correspondente permiso, así como que lle constaba unha orde xudicial de procura, personación e detención. Así mesmo, o coche carecía do seguro obrigatorio, non pasara a inspección técnica e presentaba deficiencias nas súas condicións técnicas.
