Suspendido por segunda vez o xuízo contra un irmán de Sinaí Giménez por tráfico de drogas

Suspendido por segunda vez o xuízo contra un irmán de Sinaí Giménez e outro seis acusados por tráfico de drogas

O xuízo previsto en Vigo contra un irmán de Sinaí Giménez e outro seis acusados de tráfico de drogas suspendeuse este luns por segunda vez debido a un cambio de letrado, precisamente da defensa de Marino Giménez.

O tribunal da Sección Quinta da Audiencia Provincial de Pontevedra, con sede na cidade olívica, acordou a suspensión da vista, que quedou posposta para a semana do 8 ao 12 de xuño.

Os feitos polos que se acusa a estes sete procesados, entre eles un exgarda civil, xa foron xulgados en 2017 e, nesa ocasión, impuxéronse condenas de entre catro e sete anos e medio de prisión. Con todo, o Tribunal Supremo anulou as condenas e ordenou repetir o xuízo, ao considerar que se vulnerou o principio de imparcialidade dos xulgadores.

Así, a repetición dese xuízo fixouse inicialmente para decembro pasado, pero a vista foi suspendida pola ausencia dun letrado, e aprazouse para esta semana. Agora, unha nova suspensión obriga a pospolo novamente.

A Fiscalía pide para Marino G.J. penas que suman doce anos de cárcere por ser cooperador necesario nun delito de tráfico de drogas, por integración en grupo criminal, e por tenencia ilícita de armas. Para o exgarda civil, Enrique P.M., pide un total de nove anos e medio de prisión, como autor dun delito de tráfico de drogas e outro de pertenza a grupo criminal; e para o resto de acusados solicita penas de cárcere que van desde os nove anos e medio ata os catro anos e medio de prisión.

ROUBO FRUSTRADO DUNHA PARTIDA DE COCAÍNA

Os feitos tiveron lugar a principios de 2014 cando, segundo o Ministerio Público, Marino G.J. (ao que considera xefe da banda), Enrique P.M., Marcos G.B., Alfredo I.G. e Alfonso P.C. integraban un grupo criminal dedicado ao tráfico de drogas.

O grupo ideou un plan para roubar unha partida de cocaína a outro grupo de narcotraficantes arousáns, para o que era indispensable a participación do entón axente da Garda Civil, Enrique, que debía simular un control policial e facilitar a subtracción da droga.